Phaedri libellos legere si desideras,vaces oportet, Eutyche, a negotiis, ut liber animus sentiat vim carminis. « Verum » inquis «tanti non est ingenium tuum momentum ut horae pereat officiis meis. ». Non ergo causa est manibus id tangi tuis, quod occupatis auribus non convenit. Fortasse dices : « aliquae venient feriae, quae me soluto pectore ad studium vocent. » Legesne quaeso potius viles nenias, impendas curam quam rei domesticae, reddas amicis tempora uxori vaces, animum relaxes otium des corpori, ut adsuetam fortius praestes vicem ? Mutandum tibi propositum est ; ut vitae genus intrare si Musarum limen cogites. Ego quem Pierio mater enixa est jugo, in quo tonanti sancta Mnemosyne Jovi fecunda novies Artium peperit chorum, quamvis in ipsa natus sim Phoebi schola curamque habendi penitus corde eraserim et laude in vitam hanc haut invita incubuerim, fastidiose tamen in coetum recipior. Quid credis illi accidere, qui magnas opes exaggerare quaerit omni vigilia, docto labori dulce praeponens lucrum ? Sed jam quodcumque fuerit, ut dixit Sinon ad regem cum Dardaniae perductus foret, librum exarabo tertium Aesopi stilo honori et meritis dedicans illum tuis. Quem si leges laetabor ; sin autem minus, habebunt certe quo se oblectent posteri. Jacere vidit epotam amphoram, adhuc Falerna faece ex testa nobili odorem quae jucundum late spargeret. Hunc postquam totis avida traxit naribus : « O suavis anima, quale in te dicam bonum antehac fuisse, tales cum sint reliquiae ? » Hoc quo pertineat dicet qui me noverit.Panthera et pastores
Solet a despectis par referri gratia. Panthera inprudens olim in foveam decidit. Videre agrestes ; alii fustes congerunt, alii onerant saxis ; quidam contra miseriti
periturae quippe quamvis nemo laederet, misere panem ut sustineret spiritum. Nox insecuta est ; abeunt securi domum, quasi inventuri mortuam postridie. At illa vires ut refecit languidas, veloci saltu fovea sese liberat et in cubile concito properat gradu. Paucis diebus interpositis provolat, pecus trucidat, ipsos pastores necat, et cuncta vastans saevit irato impetu.
Tum sibi timentes, qui ferae pepercerant damnum haut recusant, tantum pro vita rogant. At illa : «Memini quis me saxo petierit, quis panem dederit ; vos timere absistite ; illis revertor hostis qui me laeserunt